O Maio en San Martiño

Aquí vos deixamos unhas fotos do ben que nos quedou o Maio que fixemos en San Martiño coa axuda dos nosos maiores de Afamo.

 

Charla da asociación Sueste

 O venres da semana pasada tivemos unha charla moi interesante para o alumnado de 4º de primaria. 

Paco, a nosa mascota da biblioteca, animounos a investigar sobre as embarcacións tradicionais de Moaña e invitamos a Pablo e Cándido, que son membros da Asociación Sueste de Moaña.

Son persoas coñecedoras das embarcacións tradicionais de Galicia e quixeron compartir con nós toda a información que coñecen sobre o tema. Trouxeron unha maqueta dunha dorna e  resultou unha charla moi amena.

Queremos agradecerlles que nos dedicaran parte do seu tempo e que compartiran con nós o seu saber.

Visita á praza de Moaña

 

 A clase de primeiro foi visitar a Praza de Abastos de Moaña. Alí agardábanos Alex para guiarnos na vista.

Aprendemos moito sobre os peixes, Como fai o rape para cazar aos peixiños, por que o Martiño ten unha mancha escura e moitas curiosidades  máis.

Esta actividade está organizada polo Concello de Moaña, no seu programa Aprende Moaña.

Gustounos moito a visita.

Somos mariscadoras

Onte fomos á Xunqueira e puidemos acompañar ás mariscadoras. Pasámolo moi ben buscando marisco e xogando coa auga. Agardábanos unha sorpresa moi especial porque vimos golfiños!

Charla coa presidenta de mariscadoras

 Onte a clase de terceiro tivemos a visita de María Dolores, a presidenta de mariscadoras de Moaña. Ensinounos moitas cousas como a diferencia entre distintas ameixas, os aparellos que emprega, etc. Para rematar invitounos a ir mariscar con ela á praia da Xunqueira. Que ilusión!!!

Saída a Rialdarca

 Hoxe o alumnado de terceiro e de quinto de primaria fixemos unha andaina pola beira do río Rialdarca para prantar árbores autóctonos como a sobreira ou o madroño. Pasámolo moi ben.

O Entroido tradicional de Meira

 

 A semana pasada tivemos a sorte de recibir de novo a Manolo Cobas, bailador e mestre de baile en varias asociacións, entre elas Meiramar. 

Coma tódolos anos o alumnado de 5º de primaria é o afortunado de coñecer da man de Manolo como era o Entroido Tradicional de Meira.

Posteriormente todo o alumnado de primaria gozou de poder ver bailar a cinco nenas e nenos do colexio da man do seu mestre, Manolo.

 

4º visita o Concello de Moaña

 Coma tódolos anos o alumnado de 4º de primaria é o escollido para visitar o Concello de Moaña, dentro das actividades "Aprende Moaña".

A concelleira de ensino, Dolores,  recibiunos moi ben e foi a nosa guía durante toda a visita.

Queremos darlles as grazas á alcaldesa, Leticia, por recibirnos e atender as nosas peticións.

Por suposto tamén lle agradecemos a todo o persoal do concello as súas explicacións sobre o funcionamento do mesmo.

Aprendemos unha chea de cousas!

 

As laranxeiras

 O alumnado de Infantil, xunto cos nenos e nenas de 5º de Primaria recollimos as laranxas, aproveitando o bo tempo, das laranxeiras que temos no colexio. Tivemos unha fermosa xornada de convivencia!!!

Paseo polo río da Fraga

 

 O alumnado de 6º de primaria saíu facer unha andaina que tiñan pendente desde o curso pasado. Percorreron o sendeiro do río da Fraga acompañados dun biólogo que lles explicou unha morea de cousas moi interesantes sobre a contorna que rodea dito sendeiro. Queremos darlle as grazas por todo o que nos contou e polas cancións que nos cantou acompañado polo seu ukelele.